(تارو دا گھر - رات- تارو روٹی پکا کے ویہلی ہوئی اے-الہ دین آیا اے)
تارو: ایتنا چِر- کِتھے گیا سیں-
الہ دین: رمّو آیائے تے آیاں- رکشے ورکشاپاں والے کم بنا کے لیندے نیں- میں تے ایویں چا پھڑا کردا رہیاں کولوں- رمّو دا اُستاد اے نا ڈِبھری- مینوں آہندائے کم سِکھ اوئے الہ دِینِیا اصلی الہ دین ہو جاسیں- پڑھائیاں وچ کیہ پیائے- کہانی آوندی آ الہ دین دی؟ مکھے نہیں- اماں تینوں تے آوندی ہونی اے نا-
تارو: آہو- پر توں سُنا نا کیویں سُنائی اے اُستاد ڈِبھری-
الہ دین: لئو جی الہ دین سی نا جیہڑا اصلی- غریب آہا ٹوٹل- پر اوہ درزیاں دا مُنڈا سی صفائی والیاں دا نہیں سی- پیو اوہدا وی مر گیا ہویا سی- گھر کھان نوں نہ ہا- اوہ سکولوں اُٹھ کھلوتا- سارا سارا دن بوتلاں کٹھیاں کرنیاں کُوڑے چوں تے ٹھئیے والیاں نوں دینیاں- لئو جی اک دن کیہ ہوندائے کُوڑا پھولے پیا تے وِچ مُندری- فٹا فٹ پاون دی کیتیس- اِک اُنگل نُوں کُھلی آہی- دونہہ وِچ پھسا لئی- پا کے پھیر کُوڑا پھولن لگ پیائے- مُندری نوں لگا رگڑا تے جن حاضر (جن بن کے)
" کیا حُکم ہے حضور"
(الہ دین بن کے) ”روٹی- میرے لئی وی ماں لئی وی- تِن ٹَیم- سویرے ناشتہ- دوپہر کا کھانا- رات کا کھانا-“ لئو جی کھانا آون لگ پیا- جِناں دے حساب دا- کوک سیون اپ ڈرماں دے ڈرم، پیٹیاں چاکولیٹاں دیاں- ٹرک برگراں دے- ماں نے آکھیا جِن بھا ساڈے کول تے تھاں ای نہیں- گھر دا کر کُجھ- ایہہ تے کرائے دائے- اگوں اوہ کیہ آہندائے- میرے وس نہیں جے- اوہ ہور محکمائے- دِیوے دا جِن ہووے تے کر سکدائے- لئو جی الہ دین پھیر کُوڑے تے- دِیوا کِتھوں آوے کُوڑے وچ- بوتلاں، ڈھکنے، فیوز انرجی سیور، دِیوے تے انگیٹھیاں تے ہوندے نیں- پر جی اوہ وی لگا ای رہیا پیو دا پُتر- اخیر اِک دِن نکل نہ آیا دِیوا- چِبو چِب تے جنگال نِرا- بھوا کے ماریوس تھلے - لئو جی رگڑا لگائے دِیوے ساب نوں تے جِن حاضر- سینیئر-
"کیا حُکم ہے حضور؟"
"گھر چاہیئے ہمیں"
"کہاں سرکار ؟"
" جو نویں کوئی سوسائٹی بنی ہے وہاں"
جِن نے اکھاں بند کرائیاں نیں- کھولیاں تے نویں سوسائٹی- گھر لش لش پش پش- ڈبل سٹوری- بیڈروم تے بیڈروم شیڈروم تے شیڈروم، ڈیڈروم تے ڈیڈروم، روم ای روم ، کِچن ای کِچن- لیٹرِین تے لیٹرِین- جیدھر ویکھو ،کندھاں ہے ای نہیں- ٹی وی دِیاں کندھاں نیں - چینلاں تے چینلاں- چھے مہینے پھِرے رِموٹ تے اگوں چھ مہینے دِیاں ہور آ جان- پِچھے پورا محلہ بیوٹی پارلر- سٹھ سٹوری سو سٹوری - ہیٹھوں لِفٹاں اُتوں پُل - سبھ جُڑے ہوئے ٹِچن- ماں الہ دین دی ایدھروں چڑھے تے اودھر لتھے، اودھروں چڑھے تے ایدھر- دن وی اوتھے رات وی اوتھے- جِن نے بنک کارڈ پیش کر دِتائے- سَو سَو درزی بہہ گیائے- مشیناں چلن لگ پئیاں نیں ٹھَکا ٹھَک شہر شہر وچ- الہ دین نے میچ کرا دِتے نیں- ہر شرٹ تے ہر پتلون تے الہ دین کھلوتا دند کڈھدائے- ٹونٹی ٹونٹی، ٹن ٹن، فائیو فائیو، وَن وَن، ریکارڈ تے ریکارڈ- اُتوں الیکشن آ گئے نیں- الہ دین لڑیائے پر ہار گیائے- جِن نے آکھیا ویکھو تے سہی سَر تُسیں وزیر ہونائے تے گورمنٹ چلنی اے نہیں تے ٹُھس- اوہو ہویا- اُستاد ڈِھبری آہندائے الہ دینیا ایہہ ساڈا کُوڑ کباڑ باڈی ورکشاپاں دا- ویکھیا ای نہ- ایہو ای او- ایہدے وِچوں ای تینوں مُندرِیاں دِیوے مِل پینے نی- رگڑے لائی جائیں تے جو چاہیں کروائی جائیں-
تارو: جیہڑی میں سُنی آہی نا ہور آہی- جیہنے مینوں سُنائی اوہ تایا سی برکت دا- مِشن چ کم کریندا ہا- ایہو صفائی- اوہنے دسیا ہئی- مُندری ویاہ تے دِیوا علم- علم نال عقل آوندی اے- ہُنر آوندے نیں کمائیاں ہوندیاں نیں گھر وی بندے نیں- پھیر ویاہ وی ہوندے نیں- مُڑ بچے اگوں پڑھدے نیں- پھیر اوہ کماوندے نیں-
الہ دین: پُٹھی سُنا گیائے اوہ تینوں اَبّے دا تایا-
تارو: کیوں؟
الہ دین: مُندری والا جِن پہلوں آوندائے دِیوے والا مگروں- پر ٹھیک ای اے پہلوں ویاہ کراوے بندہ پھیر سکولے جاوے-
تارو: جنج لے کے- چل سَوں شِطانا- ماما جِناں دا- ویکھیں سویرے میں وی جِن بلاونی آں نہ بغیر مُندری دِیوے دے- کپڑے وی دھو دین تیرے تے کاپی وی نویں لیا دین-
(ہنیرا)