ہزاراں ورھے پرانی گل اے
دو عالم شہر دے وڈے بِھڑ پئے
“چنگا اوہ جیہڑا مُڈھوں مُتقی
جمن لاء توں چنگا ای کردا توڑ اپڑیا”
نہیں، چنگیرا اوہ جیہڑا بُھلیا توبہ کیتی
مُڑ پہرہ اوہدے تے دیندا پُگیا
دونویں مُڑھکو مُڑھکی گُھلدے
اپڑے اوس ویلے دے پیر پیغمبر کولے
فرمایا، میاں حوصلہ
وحی اُڈیکناں
پتہ لگا تے دس دیساں
اُنج تُسیں جے بھلکے فجریں شہروں باہر کھلو جاؤ
پوند جو آوے اوہنوں سوال ایہہ پاؤ
خوشی چاہے کُجھ گھتے پلّے
دوئے رات ساری جگراتے
پھول کتاباں بحثاں پھاتے
فجرے فصیلوں باہر آ لا تاڑی بیٹھے
کوئی آوندا دِسیا دُوروں
سُکا ادھکڑ پیروں واہنا
لک تہمت پرنا موڈھے
دوئے اُٹھ اباسیاں لیندے
کول بُلا اوہنوں دسن لگے اساں کون ہاں
مسئلہ کیہ درپیش اے سانوں
“میں سرکار جُلاہ بے حرفا
تُساں سیانے کُتب کتیبی پڑھ پُختے لِکھ لوہڑے
میں کیہ دسّو تہانوں دسّاں”
“کیہ کرئیے سانوں حُکم پیغمبری ہویائے”
ہسیا
“مُڑ اساں تاں ایہو کھڈی تے ڈِٹھائے
مُڈھوں سالم تار نالوں ترُٹ گنڈھیا تار پکیرا”
دونویں پرت پئے
“سِروں بھار لہہ گیائے”
“اِک لہہ گیائے چڑھ گیا دوجا”
“کیہڑا؟”
“سچ ساڈیاں قلم کتاباں وچ نہیں
اُنن بناون ہاریاں اُنگلاں اندر اے”
“رہندی عمر ہُن پانی ایہناں دا بھرئیے؟”
“نہیں
لِکھیا ایہناں دا پڑھیئے”
“راہ ہدایت جیہنے دکھایا
چل شُکر گذاری کرئیے اوہدی”
دونویں اپڑے، ساری سُنائی
“میاں میری شکر گذاری کاہدی
مینوں اشارہ ای کیتائے اوہنے
ٹکّر پیائے تہانوں آپے”