چھڈ اخبار نوں بھاء شپھیا
سبھ گپّاں ای گپّاں
شَپّ سُنا کوئی سانوں اپنی
“وڑ گئیاں جتھوں نِکلیاں شپاں
سپّ ای رہ گئے نیں چُولی پالے”
نہیں بھاء ڈک رکھ گھڑی اوہناں نوں
اساں شپ سُننی او
“لؤ پھیر کل دی سُن لؤ
جدوں گھر باہروں آوناں
اک اِٹ بُوہے کول رکھی ہوئی اے کُھلا بند کرن لئی
ٹھیڈا لازم لگدائے
کل وی لگائے
جی کیتائے چُک کے باہر ماراں ایس کنجری نوں
بُوہے دا سوچ کے رہ گیاں
اِٹ نوں گُھورناں پیا میں نک مُونہہ وٹ کے
نال کیہ ویکھناں سِسٹر جھنڈو”
اوہ کون اے؟
“آہو فیس بُک تے آوے بھائیا تاں تُسیں جانو
ساڈی گلی اپریشن تھیٹر ہویا سِسٹر جھنڈو دا
میم نرس دی وردی
چِٹا فراک تے چِٹی ٹوپی
گرمی سردی سِریوں سِرے گلی دے پھیرے لاوندی اے
لیڈی ولنگٹن بھرتی نرس ہوئی اے
پاکستان جد بنیائے کوئی اوَلّی ورتی
گھر گھاٹ سبھ چھڈ چھڈا کے ساڈی گلی وچ آ گئی
مُونہہ تے ماسک اے
ٹھاٹھا ڈاکٹری
گل کِسے نال کیہ کرنی اے
کیہ حُکم اے سِسٹر پُچھناں میں
کن میرے وچ گُھور کے ٹھاٹھا لاہیائے
’ویکس! سُنیں سواہ توں‘
پھیر عجیب جیہی واج اوہدے اندروں نِکلی جے
’ناں میرا کوئی نہیں
اِٹ پِھٹ تے مِٹی
تھاں توں دِتی اے اپنا بُوہا سمھالن لئی
تیرا راہ اے میری تھاں اے
ایہہ تینوں یاد کراون دا کوئی ہور طریقہ ہے تے دس دے مینوں،
نہیں سِسٹر ایہنوں آکھو اسیں وی راہ تیرے وچ آونے آں
پھیر ویکھو ایہہ سُندا‘
’چھڈ نی‘، سِسٹر جھنڈو اپنی واج وچ آہندی اے
’فُٹ فُٹ میل سُو کناں چ سٹھاں ورھیاں دی
ہُنے میں صاف اوہ کرنی آں‘
وگ تگ ٹھاٹھا چڑھایائے سِسٹر گئی ڈیوٹی تے”
اَوَلّی کیہ ورتی؟
“سائیں ناما نِیم تے آہندائے ’ایہہ جھنڈو ہِندنی اے
مومن مریض نال ہوئی خراب
اُتوں آیا سنتالی
ہندواں اوہنوں چُھری پھیری
اوہ ٹُر گئے ایہہ اوہنوں لبھدی پِھردی جے-‘
خواجے بَھوری نوں پُچھو تکیئے
’نہیں اوئے جھنڈو مسلمان اے ست پُشتاں دی
چُھری پھیر تے ایہو ناما نیم جے
وڈیاں دی اکھ دے اشارے
لاہو جیہڑا نہیں وارے
ایسے لاہیائے اوہدے ہندو عاشق نوں
ہُن کالے لا درباراں دے پھیرے لاوندائے-‘
پُھوہڑی والی تائی جَیناں آہندی اے
’جھنڈو ہسَین ہوئی اے گورے ڈاکٹر پِچھے
اوہ چھڈ لنڈن لگا گیا
ایہہ ایس گلی وچ لہہ پئی لبھدی اے اوہنوں‘
سو جیہڑے پُرانے سیانے نوں پُچھو
کہانی وکھری جے
کوئی سِکھنی دسدائے
کوئی پارسن کوئی یہودن
شیعہ سُنّی کوئی وہابن
سِسٹر جھنڈو اپریشن تھیٹر وچ اے”