“ہر کوئی دُکھی اے
دُکھ وکھو وکھ کر دھردا اے”
“جرن دی سانجھ نہیں”
“مرن دی سانجھ نہیں”
“کیویں کھٹیا وٹیا اوہلے رکھاں
ٹیکس ولاواں”
“کِس نظر وٹُو دے پِچھوں کوٹھی نوِیں وکھاواں سبھ نوں”
“مِل مُربعے شیئر کیہدے ناں لاواں کیہدے نہ لاواں”
“لاگت کیویں گھٹاواں سیل ودھاواں”
“میں ایتھے آں چھوہر باہر نیں
کِتھوں کھواواں جے اوہ گھر مُڑ آون”
“میں اوتھے ٹُر جاواں اوہ مینوں کِتھوں کھواون”
“جُھگا نہیں ایہہ رہنا سڑک پئی بندی اے
شہروں دُور گئے تاں منگن بال کیویں جاسن”
“گئے تاں مُڑ کیویں آسن”
“کوئی ول نہیں
کُل جہان بیمار اے”
“بھاویں اِکو روگ ہے سبھ نوں
بیماراں دا وکھ ہو رہن پیار اے”
“کیہ ہے سُول بیمار دا”
“مَل ہے مُول ویہار دا”
“کیویں مَل مُول مُکے
پِچھے فوجاں نیں”
“مھاڑے ای چھوہر نیں نوکر بانہیں بدوکاں نیں
اوہناں نی تنخواہیں ٹُکر ٹُرنا اے”
“اُتوں آڈر ہویا کیویں مُڑنا اے”
“اُپر تھلّے مَل اے”
“مِل ماڑے دی مل تگڑے دی رل بپار چلاوے”
“مَل دی کاری اُتھل اے اندر باہر دی”
“من دے تن دے آہر دی”
“اگ تے پانی
اوہ بجھاوے اوہ سُکاوے
کیویں دوئے رل جاون؟”
“اگ تے پانی
رَلن تاں رِنّھ کھواون”