ریڑھی اگے جُپی اے کھوتی
بتی لال ہوئی
مینڈے کھبے آن کھلوتی
باراں پلاسٹک بورے دیگاں
چِھی اُپر چِھی ہیٹھاں
راساں چھکّی بیٹھائے ریڑھی وان دُھر اُپر
ریڑھی اُلار نہیں ہوون دینی میں
پلّے ہے نیں پُلسیئے جوگے
رُکدی دے پیر تِھڑکے
ڈِگن لگی اے
نہیں
سڑک تے بُجھے نشان پرانے لِد دے مُونہہ نال ٹوہندی اے
“مینڈی اے مینڈے ساتھی دی؟
نہیں گھوڑے کنجر دی اے
ٹانگہ آیائے کچہریوں خالی، سجناں نوں قید بول گئی
ہُن ایدھر ٹانگہ کتھوں
کسے پولو باز دا ہو گڈِیرا لنگھیائے”
میں سوچناں
وڈی عید دے بکرے نالوں چپّہ ای نیویں ہوسی
چمڑے دی ودھری دا ساج سُو مُونہہ تے
جِلد ہووے جیویں باتصویر کتاب فیشنی
داڑھی نویں صوفی دی سنڈے میگزین چوں
ہووے متے حجاب فیشنی
اکھ مینڈے ول موڑِیسُ اچن چیتی
“شاعرا وے موٹر ٹوریا
ٹوہیں اپنا ساج سنگھار
لگو خبر جے اپنے حال دی
تاں تھئے اساڈڑی سار”
بتی ہری ہوئی اے
چلن لگی دے پیر اوہدے مُڑ تِلکے
پُلسیا نیڑے ہویائے
میں چونکوں پار ہو گیاں