نواں نواں پاکستان جدوں بنیائے
امرسروں اسیں نویں نویں آئے ساں
باہر لہوروں نانے دی زمین سی
میں کیتھڈرل سکول ساں پڑھدا
بھین کانونٹ وِچ سی
چُھٹی والے دِن اساں اوتھے ٹُر جانا
نِکے نِکے ننگ مننگے مُنڈے
میرے آن دوالے ہونے
چل باؤ گریجی بول کے وکھا
میں کہنا اے بی سی
اوہناں اُٹھ نچنا
اے بی سی، کِتھے گئی جی
ایڈورڈ مر گیا رون گئی ڈی
ابا جی نے شامیں لین آ جانا
ننگ مننگے کار دوالے
کوئی اُپر کوئی اگے پِچھے
ہینڈل چُک ڈرانا ڈرائیور
مساں اوہناں ہٹنا
کار سٹارٹ ہونی
نس مگرے اوہناں رولا پانا
اے بی سی کِتھے گئی جی
پِچھلے دنیں میں فوجی سکول ڈیزائن کیتا
ہفتے وِچ دو دِن جانا پیندائے
اِکدن لیبر وِچوں مینوں آہندائے اِک اگیرے ہو کے
باؤ جی یاد جے اے بی سی؟
سمجھ گیم ایہہ نانے پِنڈ دائے
پچُھیم ہس کے “کِتھے گئی جی؟”
اکھے اوہناں کول ای جیہناں دی سی
اوہدی کمائی کھاندے نیں