میرے گھر دے باہر جتھے سڑک بزار نوں مُڑدی اے
کاکا موچی بہندائے
نِکے ہوندیاں توں ویہندا آیاں وال ای چِٹے ہوئے سُو
باقی اوویں ای اے
اوہو تھاں
اوہا ویلا آون جاون دا
اوہا رنبی آر پُرانی
کدیں کدیں میں لنگھدا بُوٹ کرانا پالش
ہمیشاں پچُھدائے چاء منگاواں
پیسے لیندا ہمیشاں کہندائے رہن دیو
اج میں ایویں گل کیتی اے
“ہُن تے نویں اوزار بزار وِچ آ گئے نیں”
پیسے جیہڑے پھڑائے میں اوہنے رکھ لئے نیں چُپ کر کے
چاء پچُھن اج بُھل گیائے خبرے