ماسی سرگھی
ماں بھین نہ چاچی تائی کِسے دی
کوئی آہندے سن سولاں پاس اے
کوئی آہندے سن ناں نہیں اپنا لِکھن جاندی
اسیں تے مُنڈے کُھنڈے ای ساں تدوں
”سَو ٹپ گئی اے“ وی سُنیا
”چالیہہ، حد بتالیہہ“ وی
ہر ویلے سانوں ہری بھری اوہ
موڈھا مارن نوں وی جی کرنا
اکھ ویکھ کے لگنا جپھی پا لئی سُو
ایہہ وی سُنیا
دِل جِتھے لایا
اینے جوگا نہ ہئی اگلا
چھڈ چھڈا ایہہ کِسے مزارے بہہ گئی
کوئی آہندے سن نہیں بزارے بہہ گئی
اساں تے ایہو ویکھیا
کم کِسے وِچ اوپر کسَر نہیں
منجی اُنا لئو
لِیڑے سوا لئو
دائی دی کار کرا لئو
ہتھل جِھینی
کچی ادُھوری
پِیڑ تریڑی
کِسے گلی دروجّے جو ہے
ماسی سرگھی آکھنا سو ہے
تُرت بَوہڑ اوہنوں کرنا پُوری سچی
گل گَھٹ کرنی
پرکھ پچھان کے کرنی جدوں وی کرنی
اوہلے کھڑ کے
اِکواریں جیہنے سُننی کدے نہ بُھلنی
کل مِیئیں گنڈوئے جو دسی سُن لئو
اکھے میں آکھناں
ماسی سرگھی مرن توں ڈر کیوں لگدائے
گنڈوئیا میریا
ڈر تے تینوں جِیون دے لُون توں لگدائے
مرن سَرن ای
رِزم کلاوے بی ہو نِسرن
گنڈھ کھولن ای میں دی
تیں نال بولن ای
مرن ورھن ای گھاہ ورکھا دا دھرتی اندروں انبر وَل
کَل1 بھلک2 دے بھوگ دا گھنیئر اُٹھدا ای مِٹی سمندروں
پَھل پوندا ای بانہِیں نوں اج دے نویلے پل دا
مرن نہیوں کوئی ٹویا
گنڈوئیا جانی میریا
اِک واری جیہڑا جمیا کدے نہ مویا