”کُڑئیے ہولی پھاٹک ڈھو
سیاست کردیاں ہو تُساں پارٹی نویں بنا کے
گھر گھر پِھردیاں ہو
پتہ رکھ دُنیا دا
جندرے کُنجی پِھرن دا باہر کھڑاک نہ جاوے،
کُھلا پھاٹک بھلا ای اجکل
لنگھے کوئی جے اندر ہماتڑ مانگت لنگھے،
جندرے وجے پھاٹک ٹوہندے نی اجکل اگلے
ٹپ وڑن نوں،
تھاں جیہناں دی اوہناں دا کیہ جانائے
اپنا اوہناں دا ٹھانائے
رہنا تے ساڈا ککھ نہیں
سُنی او؟
پُچھ نا، بھولیئے ہے تیرے کول کیہ جیہڑا نہیں رہنا
بھانڈے مانجن دیاں مشیناں آ گئیاں
کپڑے دھون دِیاں
کم مُک گیا تیرا
ایتھے سٹ چھڈیونیں ایویں نشانی کر کے
آنڈھ گوانڈھ دے دھو مانجھ پئی کھانی پانی ایں
ایتھے کیہڑی داکھ لوانی نیں
پلاٹ اے وِچ اے چھپر
پہلاں پلازہ پاﺅ سُن ہُن ویچُونیں-
گھر آہیا پیو دا
پِچھے پہاڑ تے
اوہ گیا تاں ادھو ادھ بھراواں کیتا
ٹبراں جوگی تھاں وی اُتھے نہ آہی
نِکل آئی میں
وت نہ پرتی
ورھے پنجاہ ہوئے نی کہ پچونجا
تُساں تے پِھر آئیاں ہو
دسدیاں ہو باگ داکھ دے ٹھیکے چڑھدے نیں
کوئی ویلا ہا
وڈیاں دسدیاں آہیاں
سُنیا پِچھلیاں کنوں
جندرے کُھلدے وجدے نہ آہے تدوں کوئی
راہی پاہی آیا جو دانا داکھ گِھن گیا
دے کے ہتھ دی چھوہ
سہج سہج اوہ ولاں پَوڑِیاں ڈھل گئیاں
ڈھل کے بھوئیں سمائیاں
تُساں آوندیاں ہو خبر جہانی دسدیاں ہو
آہندیاں ہو جد میرے جیہیاں رل گئیاں تُساں دے نال
تاں ویلا پرت آونائے
آوے کپڑے دھو پواواں
جو کھانی آں اوہنوں کھواواں
نال سوالاں چھپرے
دوئے جوان ہو جائیے“