کیہڑا شہر ہے ایہہ
بدلاں دی جنج ڈُھکی اے جِتھاں
کُولِیاں اُنگلاں واءدِیاں
تار چھیڑ مَلہار
سڑدے ہاڑ وِچ ساون دا لارا لا گئیاں نیں
شہر ایہہ اوہا نہیں؟
زہر قہر ہا جیہڑا بابے نانک ویلے
خبرے،
شہر تے سارے زہر قہر نیں مُڈھوں
گھال دا رس ایتھے کڑھ کڑھ وِس ہو جاندا اے
ناڑیں پھردی وِس نوں سُکا کے
سُرما کرن لئی تھکیاں اکھِیں دا
گھر گھر دِل سِل پِسدی اے
ہے اچنبھا
چِھٹ وِچ ہَنج فقر دی پے جائے
وِس رس ہو چڑھ ویندی اے
ڈھا شہراں نوں
زہر قہراں نوں
سانجھی پَیلی کرن نال نہیں لہندی
کُجھ ہور وی کہندی اے