گاون
کوئی پار نہیں رات اساڈی دا
نِت منجدھار ایہہ سار اساڈی
ایہا چانن ایہا اوہلا
ایہہ مِلن نِت میلہ
کُل جہان ایہہ رات براتی
کُل جہان اسیں سارے
ہو گزرے جو واریاں پہلوں
اجے جو ہوونہارے
کوئی پار نہیں رات اساڈی دا
ایہہ اج آئی وت نہ جانی ایہو وار اساڈی
نہ دِل مرلہ نہ دِل ترلا
نہ لارے نہ دھاڑے
دھن کُل دا ، من کُل دا سانجھا
اُٹھ گئے ڈاڈھے ماڑے
ایہا رات جتن ایہا رات وطن
اساں دینہہ پردیس وسارے
کوئی پار نہیں رات اساڈی دا
لیکھیں لِکھی ازلی ابدی ایہہ ہتھ کار اساڈی